Ijtimoiy tarmoqlarda 20-21 may kunlari Toshkentdagi “Yangi O`zbekiston” istirohat bog`ida o`tkazilishi rejalashtirilgan “JARA” rus musiqa festivaliga mahalliy blogerlar tomonidan norozilik bildirildi.
Ularning fikricha, Vladimir Putin siyosatini qo`llab-quvvatlovchi rossiyalik san`atkorlarning O`zbekistondagi chiqishi respublika Ukrainadagi mojaroda Rossiya tomonini qo`llab-quvvatlashini bildiradi.
Mazkur festivalda HammAli & Navai, Ani Lorak, Egor Krid, Emin, Mari Kraymbreri, Jony, Olga Buzova kabi o`ttizga yaqin rossiyalik san`atkorlar ishtirok etishi kutilyotgan edi.
Ushbu norozilik aksiyasi ortidan kecha saytlarda ushbu rus musiqa festivali noma`lum muddatga qoldirilgani haqida xabarlar tarqaldi.
Bugun festival matbuot xizmatining Sputnik O`zbekistonga xabar berishicha, “Jara” festivali bo`yicha tashkiliy ishlar davom etmoqda.
"Festival bo`lib o`tadi, uning bekor qilingani haqidagi ma`lumotlar ishonchli emas.
Hammasi reja bo`yicha ketyapti. Barcha tomoshabin va muxlislarni 20 va 21 may kunlari Toshkentda kutib qolamiz”, deyiladi xabarda.