Ijtimoiy tarmoqda bir nechta qizlar boshqa qizni do`pposlashayotgani aks etgan video tarqaldi.
Toshkent shahar maktabgacha va maktab ta`limi boshqarmasi holatga munosabat bildirdi.
Ma`lum qilinishicha, videoda aks etgan voqea 25 aprel kuni taxminan soat 15:00 larda Shayxontohur tumani “Samarqand darvoza” MFY Uchlola ko`chasi 4-uyning erto`la qismida sodir bo`lgan.
Aniqlanishicha, shu tumandagi 82-sonli umumta`lim maktabi 7 sinf o`quvchisi S.S. dugonalari Ch., S., T. va G.lar bilan birga shu maktabning 8 sinf o`quvchisi K.M.ni do`pposlashgan hamda tasvirga olingan videoni o`zining Instagramʻdagi sahifasiga joylab tarqatgan.
Holat yuzasidan Shayxontohur tumani IIO FMB xodimlari tomonidan tergov-surishtiruv ishlari olib borilmoqda.
“Hurmatli ota-onalar! Qizlarimiz timsolida Nodirabegim, Uvaysiy, Zulfiyaxonim kabi siymolarni ko`rishga odatlanganmiz. Bugungi maktab o`quvchisi ertaga ona, bir xonadon bekasi bo`ladi.
Qizlarimiz o`zlarining ibo va hayosi bilan go`zal. Afsuski, keyingi paytlarda ular ishtirokida sodir bo`layotgan xunuk voqealar kattayu kichikni birdek ranjitib, tashvishlantirmoqda.
Hech bir zamonda o`zbek qizlarining bunday ahvolga tushmaganligi bugun barchamizning dilimizni xira qilib, millatimiz sha`niga dog` bo`lmoqda.
Bu esa nafaqat pedagoglar, balki ota-onalarimiz zimmasiga ham farzandlarimiz, jumladan, qizlarimizning tarbiyasida katta mas`uliyat yuklaydi”, - deyiladi munosabatda.
