Toshkent viloyatida telegramda nashida tarqatgan talaba yigit uch yilga qamaldi. Bu haqda Oliy sud axborot xizmati xabar berdi.
Xabarga ko`ra, J.U.ga tegishli bo`lgan iPhone X xolislar ishtirokida ko`zdan kechirilgan vaqtda uning foydalanuvida bo`lgan telefon raqamiga ochilgan Telegram profili yordamida o`zbek tilidagi “Shahid bo`lib ketsak rozi bo`lingiz” nomli “jihod” va “hijrat”ga da`vat qiluvchi diniy mazmundagi nashidalarni 10 nafar a`zosi bo`lgan “Alhamdulillah.” nomli guruhga tarqatgani aniqlangan.
Shu bois J.U.ga tegishli bo`lgan telefon ashyoviy dalil sifatida xolislar ishtirokida hujjatlashtirib olingan. Vazirlar Mahkamasi huzuridagi Din ishlari bo`yicha qo`mitaning IR-1719-sonli xulosasida taqdim etilgan materialdagi ma`lumotlar aqidaparastlik g`oyalari bilan yo`g`rilgani, ularni O`zbekiston hududiga olib kirish, tayyorlash va tarqatish taqiqlangani qayd etilgan.
Jinoyat ishlari bo`yicha Oqqo`rg`on tuman sudining 2023 yil 8 maydagi hukmiga ko`ra J.U. (2002 yilda Toshkent shahrida tug`ilgan, ma`lumoti — tugallanmagan oliy)ga Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi bilan Jinoyat kodeksining 57-moddasi (engilroq jazo tayinlash)ni qo`llab, 3 yil muddatga ozodlikdan mahrum qilish jazosi tayinlandi.
Qayd etilishicha, sudning hukmi qonuniy kuchga kirmagan bo`lib, taraflar uning ustidan qonunchilikda belgilangan tartibga muvofiq yuqori turuvchi sudga apellyasiya shikoyati berishga yoki protest keltirishga haqli.
