Samarqandda Isuzu yuk mashinasida Toshkentga olib ketilayotgan 1 tonnadan ortiq iste`molga yaroqsiz go`sht to`xtatib qolindi. Bu haqda viloyat IIB matbuot xizmati xabar berdi.
Ma`lum qilinishicha, 1 avgust kuni Samarqand viloyati IIB Jamoat xavfsizligi xizmati Karantin tadbirlarini ta`minlash guruhi, YPX xodimlari hamda Davlat veterinariya xizmati xodimlari tomonidan Bulung`ur tumanida joylashgan “Yuqori nuqta” YPX maskanida Samarqand—Toshkent yo`nalishida harakatlanib kelayotgan X.Sh. boshqaruvidagi Isuzu yuz mashinasi to`xtatilib tekshirilgan.
Tekshiruv davomida mashina yukxonasida kelib chiqishi noma`lum bo`lgan, veterinariya-sanitariya talablariga zid ravishda biror-bir hujjatlarsiz olib ketilayotgan 1 100 kilo go`sht mahsuloti borligi aniqlangan.
Ushbu go`sht mahsulotlarini iste`molga yaroqliligini tekshirish maqsadida Bulung`ur tumani hayvonlar kasalliklari tashxisi va oziq-ovqat xavfsizligi davlat markaziga olib borilib, namunalar olib tekshirilganda iste`molga yaroqsizligi ma`lum bo`lgan.
Yaroqsiz go`sht mahsulotlari tegishli tartibda yo`q qilingan. Hozirda haydovchiga nisbatan tergovga qadar tekshiruv harakatlari olib borilmoqda.
