Kecha, 15 sentyabr kuni Toshkent shahar sudining “Dok-1 Maks” ishi bo`yicha boshlangan sud majlisi davom etdi. Sud jarayoni sudya Muso Yusupov raisligida bo`lib o`tdi, deya xabar qilmoqda “hudud24” nashri.
Bu galgi majlisda dastlab sudlanuvchi A.J.ning ko`rsatmalari eshitildi. U O`zbekiston Respublikasi Sog`liqni saqlash vazirligi huzuridagi “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” davlat unitar korxonasi Farmakopiya qo`mitasida etakchi mutaxassis lavozimda ishlagan.
Boshqa sudlanuvchi va advokatlar u bilan “Dok-1 Maks” va boshqa dori vositalariga oid normativ hujjatlarning o`rganilishi, so`ngra guvohnoma muddatining yangilanishi yoki uzaytirilishi masalasini hal qilish uchun kengashga taqdim etilishi bo`yicha savol-javob qilishdi.
So`ngra Hindiston Respublikasining dori vositalarini ishlab chiqaruvchi va xorijiy mamlakatlarga etkazib beruvchi kompaniyasi vakili sanalgan sudlanuvchi sudya hamda advokatlarning qo`shimcha savollariga javob qaytardi.
Uning ta`kidlashicha, dori vositalari tarkibiga “etilen glikol” va boshqa shu kabi moddalarning aralashtirilishi ayanchli oqibatlarga olib kelishi va bu holat O`zbekiston Respublikasi qonunchiligiga ko`ra jinoyatni yuzaga keltirishini bilmagan.
Sudlanuvchi Sh.Sh esa o`ziga nisbatan e`lon qilingan ayblovga iqror emasligini bildirib, bir nechta dalillar keltirdi. Xususan, u dori vositalarining guvohnoma muddati yangilangan yoki uzaytirilganidan 3 oy o`tgach – 2022 yil iyun oyida ro`yxatdan o`tkazish bo`limi boshlig`i vazifasini bajaruvchi etib tayinlangan. Ya`ni u vakolatli lavozimda ishlamaganligini bildirdi.
Shu bilan birga, sudlanuvchi S.S va G.Elar sudga qo`shimcha dalillarni taqdim etishdi.
Sud majlisi kelasi hafta o`z ishini davom ettiradi.
