Oliy Majlis Senati Raisi Tanzila Narbaeva 16 sentyabr kuni Xalqaro migrasiya tashkilotining Sharqiy Evropa, Janubi-sharqiy Evropa va Markaziy Osiyo mamlakatlari bo`yicha mintaqaviy direktori Manfred Profasi boshchiligidagi delegasiyani qabul qildi.
O`zbekiston hamda Xalqaro migrasiya tashkiloti o`rtasida chet elda vaqtinchalik mehnat faoliyatini amalga oshirayotgan fuqarolar va ularning oila a`zolarini qo`llab-quvvatlash, odam savdosiga qarshi kurash sohasida hamkorlikni kengaytirish masalalari ko`rib chiqildi.
Ma`lumot o`rnida qayd etish joiz, O`zbekiston Xalqaro migrasiya tashkilotiga 2019 yilda to`laqonli a`zo sifatida qo`shilishi bilan hamkorlik munosabatlari yangi bosqichga ko`tarildi.
Bugungi kunda O`zbekiston va XMT o`rtasidagi hamkorlikni rivojlantirish bo`yicha 2021–2023-yillarga mo`ljallangan Amaliy harakatlar rejasi (“Yo`l xaritasi”) muvaffaqiyatli amalga oshirilmoqda. Uning doirasida migrasiya sohasidagi muhim chora-tadbirlar hayotga tatbiq etildi, chegaralarni boshqarish, odam savdosiga qarshi kurash yo`nalishida amaliy ishlar bajarildi.
Muloqot chog`ida hamkorlikni rivojlantirishga oid qator takliflar ham muhokama qilindi.
Xususan, migrasiya siyosatini takomillashtirish, odam savdosiga qarshi kurashish va migrasiya sohasida xalqaro standartlarni joriy etish, xotin-qizlar mehnat migrasiyasini qo`llab-quvvatlash bo`yicha Respublika komissiyasi bilan hamkorlikda amaliy chora-tadbirlar rejasini ishlab chiqish masalalari shular jumlasidandir.
Shuningdek, xorijiy mamlakatlarda qiyin ahvolga tushib qolgan Markaziy Osiyo davlatlari muhojirlarini qo`llab-quvvatlash bo`yicha mintaqaviy loyihani ishlab chiqish va amalga oshirish yuzasidan fikr almashildi.
Konstruktiv va amaliy ruhda kechgan uchrashuv yakunida O`zbekiston va Xalqaro migrasiya tashkiloti o`rtasida hamkorlikdagi loyihalarni kengaytirishga kelishib olindi.
