Ijtimoiy tarmoqlarda Uchtepa tumanidagi 3-sonli bolalar shifoxonasida shifokorlarning layoqatsizligi sababli bemor vafot etgani, muassasada tibbiy jihozlar va dori-darmonlar etarli emasligi haqida xabarlar tarqalmoqda.
Holat yuzasidan Toshkent shahar sog`liqni saqlash bosh boshqarmasi rasmiy ma`lumot berdi.
Ma`lum qilinishicha, ushbu voqea joriy yilning yanvar oyida yuz bergan bo`lib, huquq-tartibot idoralari tomonidan o`rganilib, uning natijasi bo`yicha javobgarlarga nisbatan tegishli choralar ko`rilgan.
Shahar 3-son bolalar klinik shifoxonasi moddiy-texnik bazasi bosqichma-bosqich yangilanmoqda. Xususan, 2017 yil Yaponiya granti asosida bolalar jonlantirish bo`limi 11 turdagi tibbiy jihozlar bilan ta`minlangan.
O`z navbatida, Xitoy, Turkiya davlatlari grantlari hamda “Salomatlik-3” loyihasi asosida kuvezlar, IVL apparatlari, bemorlar uchun funksional va bolalar krovatlari, ingalyatorlar, bioximik va gematologik analizatorlar, sentrefuga, mikroskop, avtoklav, qurutuvchi shkaf, distilyator, bidistilyator, dozatorlar, EKG va EEG apparatlari keltirib o`rnatilgan.
2020 yilda fizioterapiya bo`limi 11 turdagi fizioterapevtik apparaturalar bilan jihozlangan. O`z navbatida raqamli rentgen, dopler – UTT apparatlari, koagulograf, yarim avtomat bioximik analizator xarid qilingan.
Shuningdek, shifoxonada 2023 yil uchun dori-darmon xaridiga 2 mlrd 101 mln. so`mdan ziyod mablag` ajratilgan. Bu 2017 yilga nisbatan 3 barobar yuqori ko`rsatkich.
2022 yil yanvar oyida muassasaning “V” binosi jihozlangan holda foydalanishga topshirilib, bemorlarga qulay shart-sharoitlar yaratilgan. Yordamchi binoda qurilish-ta`mirlash va rekonstruksiya ishlari olib borilmoqda, deyiladi xabarda.
03.10.2023 14:02
Toshkent shahridagi shifoxonada bemor vafot etdi
