O`zbek adibining kitobi Turkiyada chop etildi

Turkiya poytaxti Anqara shahridagi “Kültür Ajansı” nashriyoti tomonidan O`zbekiston Yozuvchilar uyushmasi a`zosi, O`zbekistonda xizmat ko`rsatgan jurnalist Qulman Ochilning “Erkekçe sözüm” (“Yigit so`zim”) kitobi chop etildi. 
Mazkur kitobda muallifning turli yillarda yaratilgan “Nedur xayoling”, “Yigit so`zim”, “Bir kapgir osh”, “Lafz”, “Qizil ko`rpacha”,  “O`g`ri” singari o`ndan ortiq hikoyalari joy olgan. Asarlarni turk tiliga uyushma a`zosi, yozuvchi va tarjimon Rustam Jabborov tarjima qilgan. 
Kitob Turkiya Respublikasi Prezidentining Farmoniga binoan tashkil etilgan Jahon so`z akademiyasi raisi, taniqli adib, filologiya fanlari doktori, professor Xayriddin Ivgin tahriri ostida chop etildi. 
Xayriddin Ivgin mazkur kitobga yozgan so`zboshisida: “Bu yorug` olamda kitob nomlig` mo``jizaning o`rnini hech narsa bosolmaydi, - deb taxkidlaydi. - Ko`nglingizga oydinlik, hayotingizga mazmun olib kiradigan buyuk mo``jiza. Adibning “Yigit so`zim” kitobi ham qalblarga nur va ishonch bag`ishlaydigan ana shunday mo``jizalardan biri ekaniga shubham yo`q”. 
Kitob Turkiyadagi kitob do`konlarida sotuvga chiqariladi, shuningdek, kutubxonalar, ta`lim maskanlari,  ijodiy tashkilot va uyushmalarga tarqatiladi.