Shu yilning 29 oktyabr kuni Moskva shahridagi "VEB ARENA" stadionida Rossiya premer-ligasining 13-turi doirasida "SSKA" va «Krasnodar» futbol klublari o`rtasidagi uchrashuv bo`lib o`tdi. Bu haqda "Dunyo" AA muxbiri xabar bermoqda.
Ushbu o`yinni tomosha qilish uchun O`zbekistonning Rossiyadagi elchixonasi xodimlari ham tashrif buyurishdi.
Qayd etish kerakki, «SSKA» klubi safida 2023 yilning avgust oyidan beri Toshkentning «Paxtakor» klubidan o`tgan hamyurtimiz Abbosbek Fayzullaev harakat qilmoqda.
"SSKA" tarkibiga borib qo`shilganiga ko`p vaqt bo`lmagan bo`lsada, Abbosbek jamoada o`z o`rnini topishga erishdi. Jumladan, u Moskva klubining sentyabr oyidagi eng yaxshi futbolchisi deb topildi.
"SSKA" va "Krasnodar" o`rtasidagi bahs oldidan ushbu mukofotni hamyurtimizga tantanali topshirish marosimi bo`lib o`tdi. «Sentyabr oyining eng yaxshi o`yinchisi» sovrinini Abbosbekga O`zbekiston elchixonasi diplomatlari topshirishdi.
Shu kuni "SSKA" klubi tomonidan hamyurtimiz sharafiga stadion hududida O`zbekiston milliy madaniyatiga bag`ishlangan tadbir tashkil etildi. Unda o`zbek milliy kuy-qo`shiqlari ijro etildi, tematik foto hudud tashkil etildi.
Mamlakatimiz diplomatlari uchrashuvdan so`ng "SSKA" futbol klubi bosh direktori Roman Babaev bilan uchrashuv o`tkazdilar. Muloqot davomida klub rahbari hamyurtimizning professional tayyorgarlik darajasini yuqori baholadi.
