Usmoniylar saltanati o`zidan oldingi Turk-Islom davlatlarida mavjud bo`lgan diplomatik rasm-rusmlarni davom ettirgan holda, jahonning turli mamlakatlari bilan o`rnatilgan munosabatlar natijasida ba`zi yangiliklarni joriy qilish barobarida o`ziga hos diplomatiyani an`ansini dunyo miqyosida qabul qilingan rasm-rusumlarga uyg`un tarzda davom ettirgan. Ayniqsa, XIX asr mobaynida turli o`lkalardan Istanbulga kelgan xorijiy sulola vakillari va davlat arboblarining tashriflari Usmoniylar diplomatik munosabatlarini yorqin ifoda etgan.
Kuni kecha O`zbekiston Badiiy akademiyasida “Usmoniylar saltanatida diplomatiya va mehmondorchilik” ko`rgazmasining ochilish marosimi va katalogi taqdimoti bo`lib o`tdi.
Professor doktor Melek O`zetkin, dosent doktor Ayshe Ersay Yuksel, o`qituvchi-murabbiy Tug`che Kurt, mutaxassis arxitektor Ekinsu Boyraz kuratorlik qilgan mazkur ko`rgazma usmoniylar saltanatining tashkil topganidan to XIX asrgacha bo`lgan diplomatik rasm-rusmlar va faoliyatiga oid 40 dan ziyod fotosuratlar namoyish qilinmoqda. Shu bilan birga ko`rgazmada Fransiya, Shvesiya, Norvegiya, Yaponiya, Germaniya va Eron hukmdorlari va sulola a`zolarining Istanbulga qilgan tashrifga doir yozma va ko`rgazmali hujjatlar nusxalari o`rin olgan.
Ko`rgazma va ko`rgazma katalogining maqsadi usmoniylar olib borgan diplomatik faoliyat, ayni paytda zamonaviy Turkiya diplomatiyasi an`analari asoslari bilan keng jamoatchilikni tanishtirishdan iborat.
Ko`rgazma joriy yilning 4 noyabriga qadar davom etadi.
