Усмонийлар салтанати ўзидан олдинги Турк-Ислом давлатларида мавжуд бўлган дипломатик расм-русмларни давом эттирган ҳолда, жаҳоннинг турли мамлакатлари билан ўрнатилган муносабатлар натижасида баъзи янгиликларни жорий қилиш баробарида ўзига ҳос дипломатияни анъансини дунё миқёсида қабул қилинган расм-русумларга уйғун тарзда давом эттирган. Айниқса, XIX аср мобайнида турли ўлкалардан Истанбулга келган хорижий сулола вакиллари ва давлат арбобларининг ташрифлари Усмонийлар дипломатик муносабатларини ёрқин ифода этган.
Куни кеча Ўзбекистон Бадиий академиясида “Усмонийлар салтанатида дипломатия ва меҳмондорчилик” кўргазмасининг очилиш маросими ва каталоги тақдимоти бўлиб ўтди.
Профессор доктор Мелек Ўзеткин, доцент доктор Айше Эрсай Юксел, ўқитувчи-мураббий Туғче Курт, мутахассис архитектор Экинсу Бойраз кураторлик қилган мазкур кўргазма усмонийлар салтанатининг ташкил топганидан то XIX асргача бўлган дипломатик расм-русмлар ва фаолиятига оид 40 дан зиёд фотосуратлар намойиш қилинмоқда. Шу билан бирга кўргазмада Франция, Швеция, Норвегия, Япония, Германия ва Эрон ҳукмдорлари ва сулола аъзоларининг Истанбулга қилган ташрифга доир ёзма ва кўргазмали ҳужжатлар нусхалари ўрин олган.
Кўргазма ва кўргазма каталогининг мақсади усмонийлар олиб борган дипломатик фаолият, айни пайтда замонавий Туркия дипломатияси анъаналари асослари билан кенг жамоатчиликни таништиришдан иборат.
Кўргазма жорий йилнинг 4 ноябрига қадар давом этади.
