Vladimir Putin 2024 yil noyabrida bo`lib o`tadigan AQSh prezidentlik saylovi natijalarini bilmaguncha, Ukraina bilan tinchlik shartnomasi tuzmaydi. Bu haqda AQSh Davlat departamentining yuqori martabali rasmiysi yopiq matbuot anjumanida ma`lum qilgan.
“Putin bizning saylovlarimiz natijalarini ko`rmasdan turib tinchlik bitimiga yoki tinchlik kelishuviga erisha olmaydi, deb umid qilaman”, — dedi o`z nomini oshkor qilmaslik sharti bilan jurnalistlar bilan suhbatlashgan rasmiy.
Davlat departamenti vakilining aniqlik kiritishicha, bu nafaqat uning shaxsiy fikri, balki “keng tarqalgan nuqtai nazar”dir. 28 noyabr kuni Bryusselda bo`lib o`tgan NATO tashqi ishlar vazirlarining yig`ilishida barcha ittifoqchilar Ukrainani qat`iy qo`llab-quvvatlashini ma`lum bir sharoitda bildirdi”, — deya qo`shimcha qildi u.
AQSh Davlat departamenti bayonoti, boshqa respublikachilar singari Kievga keng ko`lamli harbiy yordam ko`rsatilishiga qarshi bo`lgan Donald Trampning Oq uyga qaytishi mumkinligi haqidagi qo`rquv kuchayib borayotgan bir paytda paydo bo`ldi.
Qo`shma Shtatlardagi joriy ijtimoiy so`rovlar shuni ko`rsatadiki, Donald Tramp va amaldagi davlat rahbari Jo Baydenning prezidentlikka saylanish imkoniyatlari taxminan teng.
AQSh Ukrainaning eng yirik harbiy donoridir. Oq uy ma`lumotlariga ko`ra, Rossiyaning keng ko`lamli bosqinining boshidan beri Jo Bayden ma`muriyati Kievga yordam berish uchun 60 milliard dollardan ko`proq mablag` ajratgan va bu mablag`larning 96 foizi sarflangan.
AQSh Kongressi Ukraina va Isroilga harbiy yordam paketlarini o`z ichiga olgan yillik byudjetni hali qabul qilmagan. Oktyabr oyida Bayden Kongressdan Ukrainaga 61,4 milliard dollar, Isroilga esa 14,3 milliard dollar yordam so`ragan. Noyabr oyi boshida respublikachilar nazoratidagi Vakillar palatasi Isroilga 14,3 milliard dollar ajratish haqidagi qonun loyihasini qabul qilgan edi. Ukrainaga yordam berish ushbu qonun loyihasiga kiritilmagan. Demokratlar bu hujjatni Senatda bloklashdi.
17 noyabr kuni Bayden federal hukumatni vaqtincha moliyalashtirishni davom ettirish to`g`risidagi qonunni imzoladi, bunga Isroil va Ukrainaga yordam xarajatlari kirmaydi.
