Joriy yil 12 dekabr kuni ijtimoiy tarmoqlarda “Maktab o`quvchi qizlari sinfdoshini samosud qilmoqda” sarlavhasi ostida videolavha tarqatildi.
Mazkur holat Xorazm viloyati maktabgacha va maktab ta`limi boshqarmasi ishchi guruhi hamda tegishli tashkilot vakillari ishtirokida o`rganildi va quyidagilar aniqlandi.
Videolavhada aks etgan voqea 2023 yil 15 noyabr kuni Xorazm viloyati Yangiariq tumanidagi 17-son umumiy o`rta ta`lim maktabining 7-sinf o`quvchilari o`rtasida katta tanaffus paytida sodir bo`lgan bo`lib, shu kuni ular o`rtasidagi o`zaro kelishmovchilik va janjal boshqa bir sinfdosh qiz tomonidan tasvirga olinib, ijtimoiy tarmoqqa joylanganligi ma`lum bo`ldi.
Ushbu vaziyat tuman IIB xodimlari tomonidan muhokama qilinib, profilaktika inspektorlari tomonidan O`z.Res MJtKning 47-moddasi 1-qismi bo`yicha ma`muriy bayonnoma rasmiylashtirilgan.
Kelgusida shu kabi holatlar sodir etilishining oldini olish maqsadida viloyat maktabgacha va maktab ta`limi boshqarmasi, tuman IIB, mahalla fuqarolar yig`ini faollari hamkorligida janjalda ishtirok qilgan o`quvchilar hamda ularning ota-onalari ishtirokida profilaktik suhbat o`tkazilib, tushuntirish ishlari olib borildi.
