Adliya vaziri Akbar Toshqulovning Toshkent davlat yuridik universiteti talabalari, universitet qoshidagi akademik lisey hamda Adliya vazirligi yuridik texnikumlar o`quvchilari bilan ochiq muloqoti bo`lib o`tdi.
Mazkur muloqot “Raqamlashtirish davrida huquq sohadagi zamonaviy chaqiriqlar” mavzusidagi Yosh huquqshunoslar forumi doirasida o`tkazildi.
Gibrid (onlayn va an`anaviy) shaklda tashkil etilgan ochiq muloqotda 500 nafardan ortiq yosh huquqshunoslar ishtirok etdi.
Ochiq muloqotda A.Toshqulov o`zining hayotiy tajribalari bilan o`rtoqlashdi.
Vazir o`z nutqida mamlakatimizda malakali kadrlar, xususan, professional huquqshunoslarni tayyorlash borasida qilinayotgan ishlar xususida so`z yuritib, davlatni taraqqiyotga etaklovchi avlodlar almashinuvi ro`y berishi uchun ta`limga alohida e`tibor qaratilishi lozimligini, bizning yoshlar ham dunyoning etakchi kompaniyalarida faoliyat olib borib, yangi olamshumul korporasiyalarga asos solishi kerakligini ta`kidladi. Shu bilan birga har bir iqtisodi rivojlangan davlatning orqasida ko`rinmas fundament – institutlar, qonunlar turishini, qonun hamma narsaga tarozi bo`lib xizmat qilishini, u adolat mezoni, davlatning vijdoni, standarti va o`lchovi ekanini qayd etdi.
Shuningdek, A.Toshqulov barcha sohalar qatori huquq sohasida ham kun sayin yangidan yangi muammo va vazifalar paydo bo`layotganini, huquq sohasi faqat qonunlar va qarorlar yig`indisi emas, balki jamiyat tuzilishini shakllantiradigan tirik va nafas oluvchi kuch ekanini hamda yuridik kasbning muhim jihatlaridan biri uning adolatga sodiqligida ekanini aytib o`tdi.
Forum doirasida ishtirokchilar raqamlashtirish va huquq, adliya tizimida ishlash tartibi, yosh huquqshunoslar uchun kerak bo`ladigan ko`nikmalar haqida foydali ma`lumotlarga ega bo`ldi.
Ochiq muloqot davomida Adliya vaziri talabalar va o`quvchilarning savollariga batafsil javob berdi.
