Rog`un GESining navbatdagi reaktori 2025 yilda foydalanishga topshiriladi. Bu reja haqida Tojikiston prezidenti Imomali Rahmon bugun mamlakat parlamentiga murojaati chog`ida ma`lum qilgan.
Uning ta`kidlashicha, ayni paytda Rog`un GES qurilishida 15 ming ishchi va mutaxassis mehnat qilmoqda, 3,5 ming turli texnikadan foydalanilmoqda.
Shu bilan birga, prezident Rog`un GESi qurilishi uchun hozirda 5 ming ishchi etishmasligini ta`kidladi.
– Loyihani o`z vaqtida amalga oshirish uchun hozirda 20 ming ishchi va mutaxassis zarur, – dedi davlat rahbari.
Imomali Rahmonning ta`kidlashicha, o`tgan yili GESini yakunlash uchun 5 milliard somoniy (456 million dollar) ajratilgan.
Yangi yilda uni yakunlash uchun boshqa xalqaro moliya institutlaridan mablag` jalb etilishi kutilmoqda.
Loyihaning potensial investorlari qatoriga Jahon banki, Evropa investisiya banki, Osiyo taraqqiyot banki, Evroosiyo taraqqiyot banki va boshqalar bor.
Moliya vazirligi ma`lumotlariga ko`ra, Osiyo infratuzilma investisiyalari bankidan (XXR) 500 million dollar miqdorida imtiyozli kredit jalb etish bo`yicha kelishuvlar allaqachon mavjud. Shuningdek, Saudiya taraqqiyot jamg`armasi bilan 100 million dollar miqdorida kredit ajratishni nazarda tutuvchi shartnoma imzolangan.
