Bolgariyaning Sofiya shahrida boks bo`yicha an`anaviy "Stranja" turniri o`z yakuniga etdi. Bu galgi bahslarda dunyoning 28 mamlakatidan 261 nafar charm qo`lqop ustalari o`z mahoratlarini namoyish qilishdi.
"Kichik jahon chempionati" nomini olgan mazkur musobaqa bu yil ham o`zbekistonlik bokschilarning g`alabalari bilan yakunlandi.
Erkaklar jamoasi qatorasiga to`rtinchi yil umumjamoa hisobida birinchi o`rinni qo`lga kiritdi. Rahmatjon Ro`ziohunov murabbiyligida qatnashgan bokschilar 5 ta oltin, 2 ta kumush va 5 ta bronza medallarini qo`lga kiritdi.
Shuningdek, qizlardan Sabina Boboqulova -50 kg vazn toifasida oltin, Hamrobonu Mamajonova esa -57 kg vaznda bronza medaliga sazovor bo`ldi. Shu tariqa, O`zbekiston erkaklar va ayollar terma jamoasining jamg`argan jami medallari 6 ta oltin, 2 ta kumush va 6 ta bronzani tashkil etdi.