Qozog`iston Senati (parlament yuqori hay`ati) pedofillar hamda ekstremizm va terrorizmga aloqador shaxslarning respublikaga kirishini taqiqlovchi qonun loyihasini birinchi o`qishda ma`qulladi, deb xabar berdi palata matbuot xizmati.
“Parlament deputatlari tashabbusi bilan ishlab chiqilgan “Qozog`iston Respublikasining ayrim qonun hujjatlariga aholi migrasiyasi va jazoni ijro etish tizimi sohasidagi qonun hujjatlarini takomillashtirish masalalari bo`yicha o`zgartish va qo`shimchalar kiritish to`g`risida”gi qonun birinchi o`qishda ko`rib chiqildi va ma`qullandi", - deyiladi xabarda.
Hujjatga ko`ra, “voyaga etmaganlarning jinsiy daxlsizligiga qarshi jinoyatlarda ayblangan” xorijliklarning mamlakatga kirishi taqiqlanadi.
“Shuningdek, ekstremistik yoki terrorchilik faoliyati bilan shug`ullangan xorijliklarning mamlakatga kirishiga ham taqiq joriy etilmoqda”, — deyiladi matbuot xizmati xabarida.
Ilgari ushbu hujjat respublika parlamenti quyi palatasi tomonidan tasdiqlangan edi.
11 aprel kuni Senat ham qonunga pedofillarni umrbod qamoq jazosini nazarda tutuvchi tuzatishlarni ma`qulladi.