Davlatimiz rahbari topshirig`iga asosan tuzilgan Respublika ishchi guruhi o`z faoliyatini Jizzax viloyatida davom ettirmoqda.
Prezident Administrasiyasi, Xalq qabulxonasi hamda tegishli vazirlik va idora vakillaridan tashkil topgan ishchi guruh tomonidan viloyat aholisi muammolarini hal qilish, “mahalla ettiligi” hamkorligini ta`minlash, yoshlar bilan ishlash, aholi bandligini ta`minlash, tomorqalardan foydalanishni samarali tashkil etish kabi yo`nalishlarda qator amaliy ishlar olib borilmoqda.
Prezident maslahatchisi o`rinbosari – Xalq qabulxonasi rahbari Ulug`bek Muhammadiev boshchiligidagi guruh mutasaddilari viloyat tumanlarida mahalla faollari, yoshlar bilan ochiq muloqotlar, xonadonbay o`rganishlar olib bormoqda.
Jumladan, ushbu tadbirlarda aholi tomorqalaridan unumli foydalanish, tadbirkorlik istagini bildirgan fuqarolarni qo`llab-quvvatlash orqali issiqxonalarni tashkil etish, dehqonchilik qilish uchun er maydonlarini ajratishda amaliy ko`mak berishga alohida e`tibor qaratilyapti.
Xususan, Xalq qabulxonasi tomonidan Paxtakor tumanida uy sharoitida biogumus va qo`ziqorinning shampinion turini etishtirish va shu orqali daromad topishga qaratilgan ko`rgazmali seminar tashkil etildi. Mazkur tadbir mahalla faollari, hokim yordamchilari hamda tadbirkorlikka qiziqqan yoshlar ishtirokida “BEST GOLD CROWN” MChJda tashkil etildi.
Tadbirkor A.Hayitov o`tgan yili 33 million so`mlik imtiyozli kredit evaziga 8 kvadrat metr maydonda Kaliforniya qizil chuvalchangini parvarishlashni boshlagan edi. Bugunga kelib 72 kvadrat metr maydonda ishlab chiqarishni kengaytirib, xaridorlarga 50-100 tonna biogumus etkazib bermoqda.
– Hozirgi kunda bir kilogramm biogumus bozorda o`rtacha ming so`mni tashkil etadi, - deydi A.Hayitov. – Kelgusida qishloq xo`jaligi uchun juda muhim hisoblangan bu mahsulotni tashqi bozorga ham etkazib berishga kirishsak, daromad ham shunga yarasha ko`payadi.
A.Hayitov boshchiligida turmush o`rtog`i, farzandlari tomonidan “Shanpinion” qo`zoqirini 100 metr kv.da etishtirilmoqda. Bir mavsumda o`rtacha xosil 1500 kilogrammdan oshadi.
Tadbir yakunida 15 nafar fuqaro ushbu yo`nalishda o`z tadbirkorligini boshlash istagini bildirib, Xalq qabulxonasi tomonidan kerakli amaliy ko`maklarni olishdi.
Respublika ishchi guruhining Arnasoy tumanida o`rganishlari natijasida “Bo`ston” mahallasida istiqomat qiluvchi G`aybullaev Sherzod Xalq qabulxonasi tavsiyasi asosida imtiyozli kredit olib, tadbirkorlikni boshladi. U 2 sotix maydonda pomidor ko`chatlarini etishtiradigan bo`ldi. Qolaversa, Sherzod o`zidan tashqari yana ikki kishini ish bilan ta`minladi.
“Tinchlik” mahallasida “Ayollar” va “Yoshlar” daftaridagi 29 nafar fuqaroga 20 sotixdan ajratilgan, jami 5.8 gektar er maydonida amalga oshirilayotgan “Bir kontur - bir mahsulot - bir mahalla” tamoyili asosida eksportbop mahsulotlar etishtirish uchun er tayyorlash jarayonlari bilan tanishildi va yoshlarga tegishli tavsiyalar, amaliy ko`maklar ko`rsatildi.
