Toshkent viloyatida farzandini 2 ming dollarga sotmoqchi boʻlgan ona 8 yilga qamaldi. Bu haqda Oliy sud matbuot kotibi Aziz Obidov habar byerdi.
Ma'lum qilinishicha, holat 2024 yil 29 mart kuni Qibray tumanida sodir boʻlgan. 1989 yilda tugʻilgan Z.A.ning 13 yoshli oʻgʻli va 10 yoshli qizi boʻlgan. Turmushidan ajralgan ayol ijara asosida Chirchiq shahrida yashab kelgan. Oʻtkazilgan tezkor tadbirda ayol uyida 2014 yilda tugʻilgan qiz farzandini 2 ming AQSh dollariga sotishga kelishib, shundan 500 AQSh dollarini olgan vaqtida ushlangan.
Ayol sud majlisida aybiga qisman iqrorlik bildirib, bu ishga farzandlarini boqishga qiynalgani sababli qoʻl urganini aytgan.
“Oʻgʻlim nogiron, oilada yolgʻiz boquvchiman. Farzandlarimni internet tarmogʻida va Toshkent shahridagi Chorsu bozorida kiyim-kechak sotish orqali boqib kelganman. Oʻzim qandli diabet kasalligiga chalinganman. Shuningdek, buyragimning ham bir qismi ishlamaydi. Shu sababli, ogʻir mehnat bilan shugʻullana olmayman. Farzandlarimni boqishga qiynalganim tufayli qizimni farzandga muhtoj, oʻziga toʻq oilaga berishni rejalashtirgandim. Uni sotish maqsadim boʻlmagan”, – dedi ona.
Jinoyat ishlari boʻyicha Qibray tuman sudi ayolni Jinoyat kodeksining 135-moddasi (odam savdosi) 3-qismi “a” bandida nazarda tutilgan jinoyatni sodir qilganlikda aybli deb topib, unga nisbatan 8 yil ozodlikdan mahrum qilish jazosi tayinladi.
