O‘zbekiston va Qirg‘iz Respublikalari Prezidentlarining joriy yil 18-19 iyul kunlari O‘zbekistonda bo‘lib o‘tgan uchrashuvda ikki davlat chegarasida joylashgan chegara bojxona postlaridan samarali foydalanish masalalari ham ko‘rib chiqilgan edi.
Shundan so‘ng, O‘zbekiston va Qirg‘iz Respublikalari bojxona hamda chegara xizmati rahbarlari Farg‘ona viloyatidagi mavjud bojxona postlarini ko‘zdan kechirdilar. Bu haqda Farg‘ona viloyati Bojxona boshqarmasi xabar qildi. Yangi bojxona postlarini tashkil etish va mavjudlaridan samarali foydalanish, bojxona postlaridagi tirbandliklarni oldini olish borasida olib borilgan muzokaralar natijasida joriy yilning 26 iyul kunidan boshlab Farg‘ona viloyati bojxona boshqarmasining “Farg‘ona” chegara bojxona posti hamda Shoximardonga kirish qismida joylashgan “Oq-qiya” bojxona punkti tunu kun ishlash rejimiga o‘tkazildi.
Endilikda Shoximardonga dam olgani borayotgan fuqarolar mazkur bojxona posti orqali istalgan vaqtda harakatlanish imkoniyatiga ega bo‘ldilar.
