Andijonda sport maktabi murabbiyi ishqiy munosabatdagi ma’lumotlarni tarqatmaslik evaziga 7 ming dollar talab qildi. Bu haqda viloyat IIB xabar berdi.
Ma’lum qilinishicha, 2024 yilning 27 iyul kuni Andijonda ma’sullar tomonidan o‘tkazilgan tezkor tadbirda Bolalar va o‘smirlar sport maktabi murabbiyi hamda uning bir nafar jinoiy sherigi Andijon tumanida yashovchi fuqaro bir ayol bilan ishqiy munosabatda bo‘lganigi to‘g‘risidagi audioyozuvni ayolning oila a’zolariga va huquqni muhofaza qiluvchi organlarga taqdim qilib, sharmanda qilishlarini aytib, ushbu harakatlarni bajarmaslik evaziga talab qilingan 7 ming AQSH dollarini olgan vaqtida tadbir ishtirokchilari tomonidan ashyoviy dalillar bilan ushlandi.
Mazkur holat yuzasidan olib borilgan tergovga qadar tekshiruv jarayonida sport maktabi murabbiyi hamda uning sherigi shu yilning iyun oylarida fuqaroning sir saqlanishi kerak bo‘lgan ma’lumotlarni oshkor qilmaslik evaziga 3 ming AQSH dollari miqdoridagi pullarni ham tovlamachilik yo‘li bilan olgani aniqlandi.
Hozirda mazkur holat yuzasidan Andijon viloyati IIB huzuridagi Tergov boshqarmasi tomonidan Jinoyat Kodeksining 165 moddasi 2 qismi bilan jinoyat ishi qo‘zg‘atilib, dastlabki tergov harakatlari olib borilmoqda.
