Xalq deputatlari Muzrabot tumani Kengashining navbatdan tashqari sessiyasida shu vaqtga qadar tuman hokimi vazifasida ishlab kelgan Abdurashid Ismailov boshqa ishga o‘tishi munosabati bilan lavozimidan ozod etilganligi ma’lum qilindi. Bu haqda viloyat hokimligi matbuot xizmati xabar qildi.
Qurbonov Alisher Qurbonovich nomzodini Muzrabot tumani hokimi etib tayinlash taklifi deputatlar tomonidan bir ovozdan ma’qullandi.
Alisher Qurbonov 1973 yilda Muzrabot tumanida tug‘ilgan. 1995 yilda Toshkent qishloq xo‘jaligi institutini, 2005 yilda Toshkent davlat yuridik institutini tamomlagan. Ma’lumoti bo‘yicha mutaxassisligi – iqtisodchi-tashkilotchi, yurisprudensiya.
Tayinlovga qadar A.Qurbonov “Amirqulbobo KAA” fermer xo‘jaligi rahbari bo‘lib faoliyat yuritib kelayotgan edi.
Shuningdek, Sho‘rchi tumanida ham Xalq deputatlari tuman Kengashining navbatdan tashqari sessiyasida shu vaqtga qadar tuman hokimi vazifasida ishlab kelgan Ulug‘bek Zokirov boshqa ishga o‘tishi munosabati bilan lavozimidan ozod etilib, Ishmurzoyev Akbarali Abdujabborovich yangi hokim etib tayinlandi.
Akbarali Ishmurzoyev 1982 yilda Denov tumanida tug‘ilgan. 2003 va 2009 yilda Termiz davlat universtetini tamomlagan. Ma’lumoti bo‘yicha mutaxassisligi – transport vositalaridan foydalanish, moliya.
Tayinlovga qadar A.Ishmurzoyev 2023 yildan buyon Denov tumani hokimining qurilish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari vazifasida faoliyat yuritib kelayotgan edi.
