Toshkentdagi madaniy boyliklarni — mozaikalarni ularni yopib turgan reklama bannerlaridan ozod qilish bilan tanishtiruvchi “Mosaicvertising” loyihasi xalqaro e’tirofga sazovor bo‘ldi. Bu haqda Toshkent shahar hokimligi matbuot xizmati xabar berdi.
Sentyabr oyi o‘rtalarida Batumi shahrida (Gruziya) bo‘lib o‘tgan AdBlackSea xalqaro ijod festivalida Toshkent mozaikalari haqidagi loyiha Gran-prini qo‘lga kiritdi. Shuningdek, u Media nominatsiyasining Use Of Print And Outdoor bo‘limida “oltin” mukofotga sazovor bo‘ldi.
Bundan tashqari, Qozog‘istondagi nufuzli festivalda Toshkent mozaikalari haqidagi loyiha uchta oltin va uchta bronza mukofotini qo‘lga kiritdi.
Olmaotada 21-22 sentyabr kunlari o‘tkazilgan Jolbors 2024 o‘n uchinchi xalqaro reklama festivalida Toshkent roligi uchta “oltin” mukofotni: PR campaign, ESG projects va Reputation behavioral communication nominatsiyalarida hamda uchta “bronza” mukofotni: Media campaign, PRINT OUTDOOR va Brand Experience Activation nominatsiyalarida qo‘lga kiritdi.
Shunday qilib, Toshkent mozaikalari mukofotlar soni bo‘yicha festival qahramoniga aylandi. Loyihaning barcha sovrinlarini uning rasmiy sahifasida ko‘rish mumkin.
Mukofotlarning bunday “yulduz yomg‘iri” mozaikalarni saqlash va ommalashtirishdan manfaatdor bo‘lgan davlat va xususiy tashkilotlar hamda jamoatchi shahar faollarining hamkorligi natijasida yuzaga keldi. Ya’ni, hamkorlik “o‘ylab topilgan” emas, balki shahar mozaikalariga bo‘lgan umumiy muhabbat missiyasi bilan bog‘liq edi.
Madaniyat va san’atni rivojlantirish jamg‘armasi hamda Madaniy meros agentligi tashabbusi bilan mozaikalar O‘zbekiston madaniy merosi ro‘yxatiga kiritildi. Toshkent shahar hokimligi huzuridagi Raqamli rivojlanish departamenti tomonidan mozaikalar haqidagi sayt animatsiya va kengaytirilgan reallik mobil ilovasi yaratildi.
Toshkent mozaikalarini ommalashtirish tashabbuskori, ishqiboz Fotima Abdurahmonova mozaikalarning joylashuvi va ularning mualliflari haqida ma’lumot to‘pladi.