Toshkent davlat agrar universitetining talabalar turar joyi binosida qurilish ishlari sifatsiz olib borilayotgani sabab to‘xtatildi. Bu haqda viloyat hududiy Qurilish va uy-joy kommunal xo‘jaligi sohasida nazorat qilish inspeksiyasi xabar berdi.
Qayd etilishicha, Toshkent davlat agrar universitetining 400 o‘ringa mo‘ljallangan talabalar turar joyi binosida pudratchi tashkilot "New brand house" MCHJ tomonidan sifatsiz hamda loyiha talablarini buzgan holda qurilish ishlarini olib borgan.
"Gipsakardon plitasini devorlarga yopishtirish jarayonida profillardan karkaz qilib o‘rnatilishi o‘rniga gips yordamida qotirilgan", deydi Toshkent viloyati Qurilish va uy-joy kommunal xo‘jaligi sohasida nazorat qilish inspeksiyasi bosh inspektori Ismoil Hamidov.
Bundan tashqari, binoning ichki xonalariga kirish eshiklarining "peremichka"larini o‘rnatish va tom ishlari ham tasdiqlangan loyiha hujjatlariga zid tarzda amalga oshirilgan. Bu esa obyektda texnik nazoratchi va ichki nazoratchi ishlamaganidan dalolat beradi.
Ismoil Hamidov so‘ziga ko‘ra, inspeksiya xodimlari tomonidan qurilishda aniqlangan qoidabuzarliklar yuzasidan mas’ullarga 14 marta yozma ko‘rsatmalar berilgan. Shuningdek, 3 marta jarima choralari qo‘llanilgan, ammo qurilish ishlari shu yo‘sinda davom ettirilgan.
"Bugungi kunda binoda qayta texnik tekshiruv o‘tkazilgunga qadar qurilish ishlari to‘xtatildi. Keng qamrovli reyd tadbirlari Toshkent viloyatining har bir hududida davom etmoqda", deyiladi xabarda.
