Тошкент давлат аграр университетининг талабалар турар жойи биносида қурилиш ишлари сифатсиз олиб борилаётгани сабаб тўхтатилди. Бу ҳақда вилоят ҳудудий Қурилиш ва уй-жой коммунал хўжалиги соҳасида назорат қилиш инспекцияси хабар берди.
Қайд этилишича, Тошкент давлат аграр университетининг 400 ўринга мўлжалланган талабалар турар жойи биносида пудратчи ташкилот "New brand house" МЧЖ томонидан сифатсиз ҳамда лойиҳа талабларини бузган ҳолда қурилиш ишларини олиб борган.
"Гипсакардон плитасини деворларга ёпиштириш жараёнида профиллардан карказ қилиб ўрнатилиши ўрнига гипс ёрдамида қотирилган", дейди Тошкент вилояти Қурилиш ва уй-жой коммунал хўжалиги соҳасида назорат қилиш инспекцияси бош инспектори Исмоил Ҳамидов.
Бундан ташқари, бинонинг ички хоналарига кириш эшикларининг "перемичка"ларини ўрнатиш ва том ишлари ҳам тасдиқланган лойиҳа ҳужжатларига зид тарзда амалга оширилган. Бу эса объектда техник назоратчи ва ички назоратчи ишламаганидан далолат беради.
Исмоил Ҳамидов сўзига кўра, инспекция ходимлари томонидан қурилишда аниқланган қоидабузарликлар юзасидан масъулларга 14 марта ёзма кўрсатмалар берилган. Шунингдек, 3 марта жарима чоралари қўлланилган, аммо қурилиш ишлари шу йўсинда давом эттирилган.
"Бугунги кунда бинода қайта техник текширув ўтказилгунга қадар қурилиш ишлари тўхтатилди. Кенг қамровли рейд тадбирлари Тошкент вилоятининг ҳар бир ҳудудида давом этмоқда", дейилади хабарда.
