Turkiyada teraktlar tufayli barcha aeroportlarda xavfsizlik choralari kuchaytirildi.
Qaror bir kun oldin Anqarada sodir bo‘lgan qo‘poruvchilik fonida qabul qilingan. Ma’lumotlarga ko‘ra, hozirda havo bandargohlariga kirib kelayotgan avtomashinalar sinchkovlik bilan tekshirilmoqda.
Bundan tashqari, Istanbul Sabiha Go‘kchen aeroporti sayohatchilarni qo‘shimcha tekshiruvlar haqida ogohlantirgan va uchishdan kamida uch soat oldin kelishga chaqirgan.
Eslatib o‘tamiz, 23 oktyabr kuni TUSAŞ aviakosmik kompaniyasining ishlab chiqarish obyektida terakt sodir bo‘ldi. OAV ma’lumotlariga ko‘ra, portlash 17 mingga yaqin odam ishlaydigan yirik kompaniya obyekti yaqinida sodir bo‘lgan. Kompaniya yaqinida Turkiya havo kuchlari bazasi joylashgan.
Jurnalistlarning so‘zlariga ko‘ra, terrorchilar korporatsiya kiraverishiga taksida kelishgan. Keyin mashina portlashi sodir bo‘ldi, shundan so‘ng ikki hujumchi binoga kirib, kompaniya xodimlarini garovga olgan.
Biroz vaqt o‘tgach, Erdo‘g‘an terrorchilarni yo‘q qilinganini e’lon qildi. Ayni paytda, Bosh prokuratura sodir bo‘lgan voqea yuzasidan tergovni boshlagan.
So‘nggi ma’lumotlarga ko‘ra, terakt oqibatida besh kishi halok bo‘lgan, yana 22 kishi jarohatlangan. 3 nafari shifoxonada.
Mahalliy huquq-tartibot organlari Anqaradagi terakt Kurdiston ishchilar partiyasi (Turkiyada taqiqlangan terrorchilik tashkiloti) tomonidan uyushtirilgan deb taxmin qilmoqda.
