Pokiston janubidagi mehmonxonalardan birida kelib chiqqan yong`in oqibatida kamida 11 kishi halok bo`ldi, deb xabar bermoqda “RIA Novosti”.
Nashrning bergan ma`lumotlariga ko`ra, yong`in Karachi shahridagi Regent Plaza mehmonxonasida sodir bo`ldi. Yong`in mehmonxonaning birinchi qavatida joylashgan oshxonada kelib chiqqan. Keyinroq esa olov mehmonxonaning ettinchi qavatigacha ko`tarilgan.
Olov qa`rida qolgan binodan qochish uchun ayrim mehmonlar mehmonxona derazasidan pastga sakragan.
Qutqaruv xizmati rahbari Seemina Jamalining so`zlariga ko`ra, yong`in oqibatida jabrlanganlarga suyak sinishi, turli darajadagi jarohatlar va tutundan bo`g`ilish kabi tashxislar qo`yilgan. Tutundan bo`g`ilishdan 65 kishi aziyat chekkan.
Yong`indan jabrlanganlar orasida uch nafar chet ellik fuqarolar mavjud. Ularning qaysi davlat fuqarolari ekanligi aniqlanmoqda.
O`t o`chiruvchilar yong`inni u boshlanganidan keyin uch soat ichida bartaraf qilishga muvaffaq bo`lishdi.
Yong`in sabablari hozircha noma`lum.
