Ugandada "Dinga Dinga" virusining epidemiyasi avj olgan. Buning aniq sababi noma’lum bo‘lsa-da, sog‘liqni saqlash mutaxassislari ushbu epidemiyani tekshirishga qattiq e’tibor qaratmoqda. Buyuk Britaniyaning Daily mail nashri shu haqda xabar qilgan.
Xabarlarga ko‘ra, sirli kasallik tufayli bemorlar o‘z harakatlarini nazorat qila olmay, xuddi raqs tushganga o‘xshab qaltiray boshlaydi. Natijada bemor yurishga va boshqa harakatlarni bajarishga qiynaladi. Mahalliy aholi “Dinga Dinga” deb ataydigan bu xastalik Ugandaning Bundibugyo tumanida tez tarqalmoqda va shifokorlarni hayratda qoldirmoqda.
Sog‘liqni saqlash xodimlarining so‘zlariga ko‘ra, bu xastalik bilan hozirgacha 300 bemor, asosan ayollar va qizlar og‘rigan.
Tuman sog‘liqni saqlash xodimi Doktor Kiyita Kristofer, mahalliy ommaviy axborot vositalariga bergan intervyusida aytishicha, Bundibugyo mintaqasidan tashqarida hozircha hech qanday yuqish holati qayd etilmagan. Olingan namunalar tahlil qilish uchun sog‘liqni saqlash vazirligiga jo‘natilgan.
Shifokor, shuningdek, kasallik natijasida o‘lim holatlari qayd etilmagani va kasallikni odatda antibiotiklar bilan davolash mumkinligiga ishontirdi.
Ko‘pgina bemorlar o‘zlarini davolash uchun turli giyohlardan foydalanishyapti. Biroq doktor bu usulga qarshi chiqqan.
"Giyohlar bu kasallikni davolay olishi haqida hech qanday ilmiy dalil yo‘q. Hozir maxsus davolash usullaridan foydalanyapmiz va bemorlar odatda bir hafta ichida tuzalib ketishyapti”, degan doktor.
