Ijtimoiy tarmoqlarda surxondaryolik qiz Toshkent shahri aholisini uyatli so‘zlar bilan haqoratlagani aks etgan video tarqaldi.
Mahalla raisining davosi bilan ushbu ish bugun jinoyat ishlari bo‘yicha Yunusobod tuman sudida ko‘rib chiqildi. Bu haqidagi sud qarori darakchi.uz ga taqdim etildi.
Jabrlanuvchilar videoda aytilgan so‘zlarni o‘zlariga nisbatan haqorat deb qabul qilishganini ma’lum qilishdi.
Qiz asli Surxondaryolik bo‘lib, hozirda institutning 3-kurs talabasi. U sudda aybiga iqror bo‘lib, 2025 yil 5 fevral kuni tarqalgan video aslida bir oy oldin joylanganligini va 5 daqiqada olib tashlaganini, bundan tashqari ijtimoiy tarmoqdagi sahifasi yopiq ekanligini ma’lum qildi. Uning so‘zlariga ko‘ra, o‘ziga nisbatan mahalliychilik qilgan taksi haydovchisiga toqat qilolmay shu gaplarni aytib chiqqan.
Haydovchi qizga viloyatliklar "mol" ekanliklarini va ular bugungi Toshkentdagi tirbandlikka sababchi ekanliklarini ro‘kach qilib, haqoratli so‘zlar aytgan.
Sud majlisida qizning aybi, uning aybiga iqrorligi, jabrlanuvchilarning ko‘rsatuvlari va boshqa dalillar bilan isbotlangani ma’lum qilindi. Unga nisbatan 10 sutka qamoq jazosi tayinlandi.
