Ижтимоий тармоқларда сурхондарёлик қиз Тошкент шаҳри аҳолисини уятли сўзлар билан ҳақоратлагани акс этган видео тарқалди.
Маҳалла раисининг давоси билан ушбу иш бугун жиноят ишлари бўйича Юнусобод туман судида кўриб чиқилди. Бу ҳақидаги суд қарори darakchi.uz га тақдим этилди.
Жабрланувчилар видеода айтилган сўзларни ўзларига нисбатан ҳақорат деб қабул қилишганини маълум қилишди.
Қиз асли Сурхондарёлик бўлиб, ҳозирда институтнинг 3-курс талабаси. У судда айбига иқрор бўлиб, 2025 йил 5 февраль куни тарқалган видео аслида бир ой олдин жойланганлигини ва 5 дақиқада олиб ташлаганини, бундан ташқари ижтимоий тармоқдаги саҳифаси ёпиқ эканлигини маълум қилган. Унинг сўзларига кўра, ўзига нисбатан маҳаллийчилик қилган такси ҳайдовчисига тоқат қилолмай шу гапларни айтиб чиққан.
Ҳайдовчи қизга вилоятликлар "мол" эканликларини ва улар бугунги Тошкентдаги тирбандликка сабабчи эканликларини рўкач қилиб, ҳақоратли сўзлар айтган.
Суд мажлисида қизнинг айби, унинг айбига иқрорлиги, жабрланувчиларнинг кўрсатувлари ва бошқа далиллар билан исботлангани маълум қилинди. Унга нисбатан 10 сутка қамоқ жазоси тайинланди.
