Surxondaryo viloyatida ona-bola o‘ldirilib, uyi yoqib yuborilgani aytilgan xabar ijtimoiy tarmoqlarga sizdirildi. Ushbu holat yuzasidan Bosh prokuratura matbuot xizmati rahbari Hayot Shamsutdinov darakchi.uz'ga ma’lumot berdi.
Aniqlanishicha, joriy yilning 15 fevral kuni Surxondaryo viloyati Uzun tumanida yashovchi fuqaro Sh.E. (ayol kishi) tungi soat 03:39 atrofida "102" raqamiga murojaat qilib, unda qo‘shnisi M.R.ning (ayol kishi) yashash xonadonida yong‘in bo‘layotganligini ma’lum qilgan.
Mazkur xabarga ko‘ra tezkor-tergov guruhi voqea joyiga yetib borganida, fuqaro M.R. (ayol kishi) va uning voyaga yetmagan farzandi O.H.ning (o‘g‘il bola) bosh qismidan olgan tan jarohatlari bilan murdalari topilgan. Shuningdek, bosh sohasidan olgan tan jarohati bilan voyaga yetmagan M.H. va Z.H. (qiz bola) Uzun tumani tibbiyot birlashmasi jonlantirish bo‘limiga yotqizilgan.
Mazkur holat yuzasidan JKning 97-moddasi 2-qism "a" bandi bilan jinoyat ishi qo‘zg‘atilib, hozirda dastlabki tergov xarakatlari olib borilmoqda.
