Tramp Ukrainada saylov o‘tkazishga chaqirdi va Zelenskiyning reytingini tanqid qildi.
AQSH sobiq prezidenti Donald Tramp seshanba kuni Ukrainada prezidentlik saylovlarini o‘tkazish kerakligini aytdi va bu orqali Vladimir Zelenskiyni ehtimoliy almashtirish imkoniyati paydo bo‘lishi mumkinligini ta’kidladi.
“Biz Ukrainada saylovlar o‘tkazilmayotgan bir holatda turibmiz, u yerda harbiy holat joriy qilingan, aslida bu harbiy holatning bir shakli”, – dedi Tramp Mar-a-Lago qarorgohida o‘tkazilgan matbuot anjumanida. U bu gaplarni AQSH delegatsiyasi Saudiya Arabistonida Rossiya rasmiylari bilan muzokaralarni yakunlaganidan keyin aytdi.
Tramp Zelenskiyning reytingini tanqid qilib, “uning tarafdorlari atigi 4%” ekanini da’vo qildi. Ammo so‘nggi so‘rovlar Ukraina prezidentining reytingini 50%dan yuqori darajada ekanini ko‘rsatmoqda.
Ukrainada saylovlar nega o‘tkazilmayapti?
Prezidentlik saylovlari 2024 yil aprel oyiga belgilangan edi, ammo Ukrainada 2022 yil fevral oyida Rossiya tomonidan keng ko‘lamli hujum boshlanganidan beri harbiy holat joriy qilingani uchun saylovlar bekor qilindi.
2023 yilda Zelenskiy saylov o‘tkazish hozircha maqsadga muvofiq emasligini aytgan. Uning fikricha, hozirgi sharoitda siyosiy raqobat kuchayib ketishi mumkin va bu mamlakat mudofaasiga salbiy ta’sir ko‘rsatadi.
Tramp Saudiya Arabistonida Rossiya va AQSH vakillari o‘rtasida 4,5 soat davom etgan muzokaralarda Ukraina rasmiylari ishtirok etmaganini qayd etdi.
Ukraina prezidenti Zelenskiy Turkiyadagi matbuot anjumanida Ukraina vakillari mazkur uchrashuvga taklif qilinmaganidan "hayratlanganini" bildirdi. “Uch yilga yaqin vaqtdan beri urush olib borayotgan mamlakatning vakillari nega taklif qilinmagan?” – dedi u.
Tramp esa bu borada shunday javob qaytardi: “Agar ular muzokaralarda qatnashishni istasa, Ukraina xalqi: ‘Bizga ancha vaqtdan beri saylov o‘tkazilmagan, biz bu haqda gapirishimiz kerak’, deyishlari kerak emasmi?”
“Bu Rossiya talabi emas,” – dedi Tramp. “Bu mendan kelayotgan fikr, shuningdek, ko‘plab boshqa davlatlar ham Ukrainada saylov bo‘lishi kerak deb hisoblaydi. Ukraina yo‘q bo‘lib ketmoqda.”
Tramp va Zelenskiy o‘rtasidagi ziddiyat kuchayayaptimi?
Zelenskiy avvalroq, Rossiya Ukrainada yangi saylov o‘tkazishni tinchlik shartnomasining bir qismi sifatida ilgari surishga urinmoqda, deb bayonot bergan va buni “ultimatum” sifatida qabul qilmasligini aytgan.
So‘nggi haftada Trampning Zelenskiy haqidagi fikrlari o‘zgargani kuzatilmoqda. U Vladimir Putin bilan telefonda gaplashganidan so‘ng va uning jamoasi Saudiya Arabistonida Rossiya rasmiylari bilan muzokaralar o‘tkazganidan keyin Ukraina prezidentiga munosabati ancha sovuqlashgan.
Tramp shunday dedi: “Men Zelenskiyni shaxsan yoqtirishim mumkin, lekin shaxsiy munosabatlar men uchun muhim emas.”
“Men uchun muhim narsa – ishni bitirish. Hozirgi rahbariyat urushga yo‘l qo‘ydi, bu esa umuman bo‘lmasligi kerak edi.”
Tramp Zelenskiyni moliyaviy yordamni noo‘rin sarflashda aybladi
Tramp AQSH Ukrainaga ajratayotgan mablag‘larning sarflanishiga shubha bildirdi.
“Bizning bergan barcha pullarimiz qayerga ketmoqda? Qaysi yo‘nalishga? Men hech qachon bunga oid hisobot ko‘rgan emasman. Biz yuzlab milliard dollar beramiz, lekin hisobot yo‘q. Men esa tinchlikni ko‘rishni istayman.”
Shuningdek, Tramp Ukraina urushni “boshlagan” davlat deb aytib, bahsli bayonot berdi. Bu fikr Ukraina hududiga Rossiya raketa hujumlari uyushtirgani va Moskva keng ko‘lamli hujumni boshlagani haqidagi faktlarga mos kelmaydi.
Abdulloh Sayyid
