Toshkent shahri jamoat transportini monitoring va nazorat qilish davlat muassasasi bilan birgalikda avtobuslarda yo‘l haqini to‘lamasdan tushib ketayotgan yo‘lovchilarni aniqlash bo‘yicha kuchaytirilgan reydlar boshlandi. Bu haqda Transport nazorati inspeksiyasi axborot xizmati ma’lum qildi.
Qayd etilishicha, aksariyat yo‘lovchilar to‘lovlarni o‘z vaqtida amalga oshirib, “tizim qulayligini e’tirof etayotgan bir pallada, ayrimlar yo‘l haqini hech qanday sababsiz to‘lamasdan avtobusdan tushib ketayotgani” tez-tez uchrab turibdi.
“Toshshahartransxizmat” kompaniyasining aniqlik kiritishicha, chiptasiz yurganlarni jarimaga tortish 14-mart sanasidan boshlangan.
Ularga Ma’muriy javobgarlik to‘g‘risidagi kodeksning 144-moddasi 5-bandiga asosan yo‘lovchining shahar ichida va shahar atrofiga qatnaydigan avtobusda chiptasiz yurishi BHMning o‘ndan bir qismi — 37 ming so‘m miqdorida jarima solinadi.
To‘lov bir martalik QR-chiptalar yordamida amalga oshirilganda, uni safar davomida saqlab qolishi hamda nazoratchi va inspektorlarining so‘roviga asosan ularga ko‘rsatishlari lozim. Xodimlar bunday tekshiruvlarni har kuni o‘tkazadi.
