Toshkent shahri Nukus ko‘chasida joylashgan ko‘p qavatli uyning tashqi qismida 13 iyun kuni yong‘in sodir bo‘ldi. Bu haqda Favqulodda vaziyatlar vazirligi xabar berdi.
Ma’lum qilinishicha, yong‘in haqidagi xabar soat 10:21 da shahar Favqulodda vaziyatlar boshqarmasiga kelib tushgan. Qutqaruvchilar voqea joyiga 10:23 da yetib borgan.
Yong‘in boshlanganidan so‘ng uy aholisi xavfsiz hududga evakuatsiya qilingan.
Hodisa soat 11:00 da yong‘in tarqalishi to‘xtatilgan, 11:10 da esa to‘liq o‘chirilgan.
Dastlabki ma’lumotlarga ko‘ra, jabrlanganlar yo‘q.
Ijtimoiy tarmoqlarda tarqalgan kadrlarda binoning tashqi qoplamasi alanga olgani aks etgan. Yong‘in sabablari aniqlanmoqda.
