Myanmadagi vayronkor zilzila qurbonlari soni 3084 kishiga yetdi, yana 4715 kishi jarohat oldi. Bu haqda Myanma harbiy xuntasi 3 aprel, payshanba kuni ma’lum qildi. Mamlakatda 1 apreldan boshlab bir haftalik motam e’lon qilindi.
Zilziladan uch kun o‘tib, binolar vayronalari ostida qolganlarni tirik holda topishga umid deyarli yo‘q, deb yozadi AFP agentligi. Qutqaruv ishlari issiq havo tufayli murakkablashmoqda, havo harorati 40 darajagacha ko‘tarilmoqda.
Zilzila epitsentriga yaqin joylashgan Mandalay shahrida jazirama qurbonlar jasadlarining parchalanishini tezlashtirdi, bu ularning shaxsini aniqlashni qiyinlashtirishi mumkin, deya qayd etadi agentlik.
Jahon sog‘liqni saqlash tashkiloti (JSST) fuqarolar urushi avj olgan mamlakatda kasallikning tarqalish xavfi tufayli favqulodda holatning eng yuqori darajasini e’lon qildi.
JSSTga ko‘ra, Myanmada hayotiy muhim yordam taqdim etish, kasalliklar tarqalishining oldini olish va asosiy tibbiy xizmatlarni tiklash uchun zudlik bilan 8 million dollar (7,4 million yevro) kerak.
Myanma harbiy rahbari Min Aun Xlayn "har bir davlat, har bir tashkilotdan" yordam so‘ragan. Ilgari mamlakat harbiy ma’muriyati hatto yirik tabiiy ofatlar yuz bergan taqdirda ham xalqaro yordamdan bosh tortgandi, deb ta’kidlaydi AFP.
