Мянмадаги вайронкор зилзила қурбонлари сони 3084 кишига етди, яна 4715 киши жароҳат олди. Бу ҳақда Мянма ҳарбий хунтаси 3 апрель, пайшанба куни маълум қилди. Мамлакатда 1 апрелдан бошлаб бир ҳафталик мотам эълон қилинди.
Зилзиладан уч кун ўтиб, бинолар вайроналари остида қолганларни тирик ҳолда топишга умид деярли йўқ, деб ёзади AFP агентлиги. Қутқарув ишлари иссиқ ҳаво туфайли мураккаблашмоқда, ҳаво ҳарорати 40 даражагача кўтарилмоқда.
Зилзила эпицентрига яқин жойлашган Мандалай шаҳрида жазирама қурбонлар жасадларининг парчаланишини тезлаштирди, бу уларнинг шахсини аниқлашни қийинлаштириши мумкин, дея қайд этади агентлик.
Жаҳон соғлиқни сақлаш ташкилоти (ЖССТ) фуқаролар уруши авж олган мамлакатда касалликнинг тарқалиш хавфи туфайли фавқулодда ҳолатнинг энг юқори даражасини эълон қилди.
ЖССТга кўра, Мянмада ҳаётий муҳим ёрдам тақдим этиш, касалликлар тарқалишининг олдини олиш ва асосий тиббий хизматларни тиклаш учун зудлик билан 8 миллион доллар (7,4 миллион евро) керак.
Мянма ҳарбий раҳбари Мин Аун Хлайн "ҳар бир давлат, ҳар бир ташкилотдан" ёрдам сўраган. Илгари мамлакат ҳарбий маъмурияти ҳатто йирик табиий офатлар юз берган тақдирда ҳам халқаро ёрдамдан бош тортганди, деб таъкидлайди AFP.
