2026 yilning yanvar–may oylari davomida O‘zbekistonga turistik maqsadlarda 5 million 351 ming 868 nafar chet el fuqarosi tashrif buyurdi. Bu haqda Milliy statistika qo‘mitasi ma’lum qildi.
Qayd etilishicha, mazkur ko‘rsatkich o‘tgan yilning mos davriga nisbatan 1,1 million nafarga yoki 27,3 foizga oshgan.
Hisobot davrida O‘zbekistonga eng ko‘p turist Qirg‘iz Respublikasidan kelgan bo‘lib, ularning soni 1 million 539 ming 503 nafarni tashkil etgan.
Keyingi o‘rinlardan Qozog‘iston va Tojikiston joy olgan. Ushbu davlatlardan mos ravishda 1 million 246 ming 689 nafar va 1 million 211 ming 60 nafar fuqaro O‘zbekistonga tashrif buyurgan.
Shuningdek, hisobot davrida Rossiyadan 465 ming 885 nafar, Afg‘onistondan 198 ming 910 nafar, Xitoydan 178 ming 121 nafar, Turkmanistondan 136 ming 997 nafar, Turkiyadan 78 ming 312 nafar, Hindistondan 20 ming 807 nafar hamda Germaniyadan 18 ming 291 nafar turist O‘zbekistonga kelgan.
Shunday qilib, Markaziy Osiyo davlatlari O‘zbekistonga eng ko‘p turist yuborgan mamlakatlar sifatida yetakchilikni saqlab qolmoqda.
