Kecha, 3-aprel kuni Toshkent shahrining Yunusobod tumanida“BYD” mashinasi beton to‘siqqa urilib, yonib ketdi. Bu haqda Toshkent shahar IIBB Yo‘l harakati xavfsizligi boshqarmasi axborot xizmati ma’lum qildi.
Qayd etilishicha, yo‘l-transport hodisasi tungi soat 23:45 larda Yunusobod tumani TXAY ko‘chasida yuz bergan. Shu ko‘cha bo‘ylab harakatlanib kelayotgan “BVD” mashinasi haydovchisi rul boshqaruvini yo‘qotib, yo‘lni ajratib turuvchi beton to‘siqqa urilgan. Buning oqibatida mashinada yong‘in kelib chiqqan.
“Yong‘in tuman FVB xodimlari tomonidan bartaraf etilgan. YTH ortidan haydovchiga shifokorlar tomonidan tibbiy yordam ko‘rsatilgan”,— deyiladi xabarda.
Hozirda mazkur hodisa yuzasidan YHXB hamda FVB xodimlari tomonidan surishtiruv olib borilib, yongin yuzaga kelishining sabablariga aniqlik kiritilmoqda.
