Ukraina Prezidenti Vladimir Zelenskiy Rossiya Prezidenti Vladimir Putinga G7 sammiti doirasida uchrashib, urushni to‘xtatish masalasini muhokama qilishni taklif qilganini ma’lum qildi. Bu haqda Reuters agentligi xabar berdi.
Zelenskiyning so‘zlariga ko‘ra, Kiyev tomoni muzokaralarga tayyor ekanini bildirgan. Uchrashuvda AQSh Prezidenti Donald Tramp va Fransiya Prezidenti Emmanuel Makron ham ishtirok etishi mumkin.
“Biz G7 sammiti doirasida Putin bilan uchrashishga tayyor ekanimizni ma’lum qildik. U yerda Tramp va Makron ham bo‘ladi. Yevropa va AQSh ishtirok etadigan bunday format muzokaralar uchun yaxshi imkoniyat bo‘lardi”, dedi Zelenskiy jurnalistlar bilan muloqotda.
Ukraina rasmiylariga ko‘ra, mazkur taklif AQSh va Fransiya tomonlariga yetkazilgan, shuningdek, Rossiya vakillariga ham yuborilgan. Biroq hozircha Moskvadan rasmiy javob olinmagan.
Zelenskiy Rossiyaning bu boradagi sukunatini Moskvaning muzokaralarga tayyor emasligi sifatida baholadi. U avval ham Putinga yuzma-yuz uchrashuv o‘tkazish taklifini bildirgan edi. Rossiya Prezidenti esa bunday muloqot uchun zarurat ko‘rmayotganini aytgan.
Ukraina rahbarining mazkur bayonoti Rossiya armiyasining Kiyev va Xarkov shaharlariga navbatdagi hujumlaridan keyin yangradi. Dastlabki ma’lumotlarga ko‘ra, zarbalar oqibatida kamida 10 kishi halok bo‘lgan.
Zelenskiy G7 sammitidagi asosiy maqsadlaridan biri Ukrainaning havo hujumidan mudofaa tizimlarini kuchaytirish masalasini muhokama qilish ekanini ta’kidladi. Shuningdek, u G‘arb davlatlari bilan Rossiyani urushni to‘xtatishga undashga qaratilgan qo‘shimcha chora-tadbirlarni ham ko‘rib chiqishini ma’lum qildi.
