Janubiy Koreya prezidenti Yun Sok Yol mamlakatda harbiy holat e’lon qilishga muvaffaqiyatsiz uringanidan 4 oy o‘tib, lavozimidan butunlay chetlashtirildi. Konstitutsiyaviy sud uning impichmenti haqidagi qarorni o‘z kuchida qoldirdi. Bu haqda “BBC” ma’lum qildi.
Qayd etilishicha, Yunga qarshi impichmentni qo‘llab-quvvatlash uchun 8 nafar sudya ishtirok etgan. Ular hukm chiqarish vaqti prezident o‘z qarori bilan konstitutsiya, qonun ustuvorligi va demokratiya tamoyillarini buzganini ta’kidlagan.
Endi mamlakatda 60 kun ichida yangi prezidentlik saylovi bo‘lib o‘tishi kerak.
Ma’lumot uchun, 2024-yilning dekabrida Yun mamlakatda harbiy holat e’lon qilishga muvaffaqiyatsiz uringan edi. Shundan so‘ng parlament uni isyonga urinishda ayblab, davlat rahbariga impichment e’lon qilgan.
U vazifasidan chetlatilgan, ammo uni lavozimidan butunlay chetlatish uchun Konstitutsiyaviy sudning qarori kerak edi. Bu vaqt davomida Yun Sok Yol rasman Janubiy Koreya prezidenti bo‘lib qolgan.
U isyonga urinish ayblovlarini rad etgan va “siyosiy jihatdan tekshirilgan qarori” davlatni muxolifatdan himoya qilish uchun qabul qilinganini aytgan. Uning advokatlari Konstitutsiyaviy suddagi jarayon “noqonuniy va adolatsiz” bo‘lganini bildirgan. Mart oyida sud prezident Yun Sok Yolni hibsdan ozod qilib, unga qarshi hibsga olish orderini bekor qilgan edi.
