Bugun, 5 aprel kuni Rossiyaning Sankt-Peterburg shahridan O‘zbekistonning 16 nafar voyaga yetmagan fuqarosi Ichki ishlar va Sog‘liqni saqlash vazirligi xodimlari hamrohligida mamlakatga qaytarildi. Bu haqda Ijtimoiy himoya milliy agentligi xabar berdi.
Ma’lum qilinishicha, bolalarni mamlakatga qaytarish chog‘ida Sankt-Peterburg va Moskvadagi O‘zbekiston konsullik idoralari ularni davlat fuqarosi sifatida identifikatsiya qilish va ularga qaytish sertifikatlarini rasmiylashtirish bo‘yicha barcha choralarni ko‘rgan.
“Hozirda bolalar vaqtincha Toshkent shahar Ichki ishlar bosh boshqarmasi qoshidagi Voyaga yetmaganlarga ijtimoiy-huquqiy yordam ko‘rsatish markaziga joylashtirildi”, deyiladi xabarda.
Bildirilishicha, markazda ularning ota-onalari va yaqin qarindoshlari “Inson” ijtimoiy xizmatlar markazlari tomonidan oldindan tayyorlangan vasiylik hujjatlari bilan kutib olishgan.
Qo‘shimcha qilinishicha, olib kelingan 16 nafar bolalarning 11 nafari ota-onalariga, qolganlari esa vasiylik asosida qarindoshlariga topshirilgan.
Ma’lumot uchun, o‘tgan uch oyda xorijdan O‘zbekistonga qaytarilgan bolalar soni 68 nafarni tashkil qilgan.
