Бугун, 5 апрель куни Россиянинг Санкт-Петербург шаҳридан Ўзбекистоннинг 16 нафар вояга етмаган фуқароси Ички ишлар ва Соғлиқни сақлаш вазирлиги ходимлари ҳамроҳлигида мамлакатга қайтарилди. Бу ҳақда Ижтимоий ҳимоя миллий агентлиги хабар берди.
Маълум қилинишича, болаларни мамлакатга қайтариш чоғида Санкт-Петербург ва Москвадаги Ўзбекистон консуллик идоралари уларни давлат фуқароси сифатида идентификация қилиш ва уларга қайтиш сертификатларини расмийлаштириш бўйича барча чораларни кўрган.
“Ҳозирда болалар вақтинча Тошкент шаҳар Ички ишлар бош бошқармаси қошидаги Вояга етмаганларга ижтимоий-ҳуқуқий ёрдам кўрсатиш марказига жойлаштирилди”, дейилади хабарда.
Билдирилишича, марказда уларнинг ота-оналари ва яқин қариндошлари “Инсон” ижтимоий хизматлар марказлари томонидан олдиндан тайёрланган васийлик ҳужжатлари билан кутиб олишган.
Қўшимча қилинишича, олиб келинган 16 нафар болаларнинг 11 нафари ота-оналарига, қолганлари эса васийлик асосида қариндошларига топширилган.
Маълумот учун, ўтган уч ойда хориждан Ўзбекистонга қайтарилган болалар сони 68 нафарни ташкил қилган.
