Iqlimshunos olim Erkin Abdulahatovga Eron va Isroil o‘rtasidagi keskinliklar ortishi, Eronning yadroviy obyektlari, uran kon zaxiralariga raketa zarbalari fonida o‘sha obyektlardagi qandaydir radioktiv halokatlarning O‘zbekistonga ham ta’siri bormi, degan savollar kelib tushgan.
Uning ta’kidlashicha, bordi-yu radioaktiv nurlanish faollashsa, muayyan ob-havo sharoitlarida ana o‘sha hududlardagi radioaktiv nur bizning O‘zbekistonga kirib kelishi mumkin. Bu, O‘zbekistonga kirib keluvchi va rivojlanuvchi 15 sinoptik jarayonning 2-3 tasida ro‘y beradi.
Olimning qo‘shimcha qilishicha, bu jarayonlar yozgi termik depressiya va past bosimli kichik gradiyentli atmosferasi sohasi jarayonidir. Ushbu jarayonlar 11- va 13-tur sinoptik jarayonlari deyiladi.
Bu ikki jarayon yoz oylarida bizning mintaqada hukmron jarayonlar ekani inobatga olinsa, hozirgi sharoitda Eron hududlaridagi oqimlarning bizning mintaqaga to‘siqlarsiz bemalol kirib kelishini taxmin qilish mumkin. Bekorga xalq orasida yoz oylaridagi issiqliklar "bizga Turkmaniston orqali Eron hududlaridan kirib keladi" degan gap ommalashmagan, deydi iqlimshunos.
