Bugun, 27 iyun – O‘zbekistonda Matbuot va ommaviy axborot vositalari xodimlari kuni. Bu sana, mustaqillik yillarida – 1993 yildan boshlab rasmiy ravishda kasb bayrami sifatida nishonlanadi.
Har yili ushbu kunda minglab jurnalistlar, muharrirlar, bloggerlar, texnik mutaxassislar va media sohasining boshqa fidoyilari e’tirof etiladi.
Bugungi kunda yurtimizda 2 ming 400 dan ortiq ommaviy axborot vositalari faoliyat yuritmoqda, ularning 65 foizi nodavlat sektoriga tegishli. Rasmiy ma’lumotlarga ko‘ra, O‘zbekistonda 10 mingdan ortiq jurnalist va media xodimi axborot makonida faoliyat olib bormoqda. Ular jamiyatdagi eng dolzarb masalalarni ko‘tarib chiqadi, xalq bilan davlat o‘rtasida axborot ko‘prigi bo‘lib xizmat qiladi.
Prezident Shavkat Mirziyoyev bugungi bayram munosabati bilan jurnalistlarni tabriklar ekan, ularning haqqoniy axborot yetkazishdagi fidokorligini Vatan posbonlari jasoratiga qiyosladi.
Prezident so‘z erkinligini ta’minlash, bolalar uchun milliy kontentni rivojlantirish va yosh jurnalistlarni tarbiyalash borasidagi yondashuvlarga alohida urg‘u berdi.
Shuningdek, “Oltin qalam” milliy mukofoti ilk bor aynan 27 iyun kuni topshiriladigan bo‘ldi.
Bugun siz – jurnalistlar, teleradiochilar, muharrirlar, sahifadoshlar, ovoz ustalari va rejissyorlar eng katta e’tirofga loyiqsiz.
Sizlar haqiqatni qidirasiz, dardni gapirasiz, muammoga yechim izlaysiz. Va eng muhimi – sukut saqlamasdan aytasiz!
“Darakchi.uz” jamoasi barchangizni ushbu qutlug‘ sana bilan chin dildan tabriklaydi! Sizlarga mustahkam sog‘liq, kuchli ijtimoiy mas’uliyat, haqqoniy so‘z va yorqin g‘oyalar tilaymiz!
Kasb bayramingiz muborak bo‘lsin!
