Moskvada sodir bo‘lgan ushbu ayanchli voqea bo‘yicha tergov harakatlari boshlandi. Taqdim etilgan ma’lumotlarga ko‘ra, 26 yoshli O‘zbekiston fuqarosi tomonidan 50 yoshli kar-soqov erkakka nisbatan jismoniy kuch qo‘llanilishi oqibatida u vafot etgan.
Voqea 2025 yil 20 iyul kuni chiqindi konteynerlari yaqinida sodir bo‘lgan. Mahalliy boshqaruv kompaniyasida vaqtinchalik ishchi sifatida faoliyat yuritayotgan ikki muhojir axlatni saralayotgan vaqtda kar-soqov erkak ishoralar orqali norozilik bildirgan. Gumonlanuvchilar uning harakatlarini tajovuz sifatida qabul qilganliklarini bildirishgan.
Shundan so‘ng, migrantlardan biri uni kaltaklagan. Jabrlanuvchining qorniga ikki marta, boshiga esa bir marta kuchli zarba berilgani aniqlangan. Erkak hech qanday qarshilik ko‘rsatmagan bo‘lsa-da, yiqilib tushganidan so‘ng boshini yerga urib, og‘ir jarohat olgan. Gumonlanuvchilar hodisa izlarini yashirish maqsadida uning jasadini butalar orasiga olib borib, voqea joyidan qochib ketgan.
Tergovchilar kuzatuv kameralari orqali jinoyat tafsilotlarini aniqlab, gumonlanuvchini qo‘lga olishga muvaffaq bo‘lishdi. U Rossiyada noqonuniy yashab kelgan bo‘lib, hozirda hibsda saqlanmoqda.
Unga nisbatan “Ehtiyotsizlik oqibatida o‘limga olib kelgan og‘ir tan jarohati yetkazish” moddasi bo‘yicha jinoyat ishi qo‘zg‘atilgan.
