Turkiya Prezidenti Rajab Toib Erdo‘g‘on mamlakatda davom etayotgan o‘rmon yong‘inlari yuzasidan bayonot berdi. Unga ko‘ra, “Yashil Vatan” asrash uchun 27 ta samolyot, 105 ta vertolyot, 6 mingga yaqin yer usti texnikasi va 25 ming o‘rmon xodimi safarbar etilgan. Bundan tashqari, 132 ming ko‘ngilli yong‘inlarga qarshi kurashda ishtirok etmoqda.
“Yoz mavsumi boshidan buyon mamlakatimizda 3 ming 62 ta yong‘in to‘liq bartaraf etildi”, – dedi Erdo‘g‘on o‘zining ijtimoiy tarmoqdagi sahifasi orqali e’lon qilgan bayonotida. U, shuningdek, ayni paytda Turkiyaning bir necha hududida davom etayotgan yong‘inlarni bartaraf etish bo‘yicha ishlar uzluksiz davom etayotganini ta’kidladi.
“Tarım va O‘rmon Vazirligimiz boshchiligida barcha tegishli idoralar, AFAD (Favqulodda vaziyatlar boshqarmasi) koordinatsiyasida, yuqori darajadagi hushyorlik, fidoyilik va mas’uliyat bilan harakat qilmoqda”, — deydi Erdo‘g‘on.
Prezident, yong‘inlar vaqtida halok bo‘lganlar haqida ham to‘xtaldi: “Yong‘inlarga qarshi kurashda jonini fido qilgan qahramonlarimizga Allohdan rahmat tilayman. Ularning ruhi shod bo‘lsin”, — deya yakunladi Erdo‘g‘on.
So‘nggi yillarda iqlim o‘zgarishlari fonida Turkiyada yozgi mavsum yong‘inlar bilan bog‘liq favqulodda holatlarga boy bo‘lmoqda. Mutaxassislar mamlakat janubidagi o‘rmonlar har yil yanada xavfli holatga kelayotganini ogohlantirib kelishmoqda.
