Qirg‘izistonning sobiq prezidenti Almazbek Atamboyev barcha davlat mukofotlaridan mahrum etildi. Tegishli farmon 29-dekabr kuni mamlakat prezidenti Sadi Japarov tomonidan imzolandi. Hujjat Bishkek shahrining Birinchi may tuman sudi 3-iyundagi hukmni ijro etish maqsadida qabul qilingan.
Farmonga ko‘ra, Atamboyev "Qirg‘iziston Qahramoni" unvoni, "Manas" ordenining II darajasi, "Danaker" ordeni hamda "Dank" medalidan mahrum etildi. Shuningdek, ushbu mukofotlarni berishga oid ilgari chiqarilgan bir qator prezident farmonlari haqiqiy emas deb topildi.
Davlat mukofotlari va ularga oid hujjatlarni belgilangan tartibda olib qo‘yish Bosh prokuratura huzuridagi sud ijrochilari xizmatiga topshirildi. Farmon imzolangan kundan boshlab kuchga kirgan.
