Қирғизистоннинг собиқ президенти Алмазбек Атамбоев барча давлат мукофотларидан маҳрум этилди. Тегишли фармон 29-декабр куни мамлакат президенти Садир Жапаров томонидан имзоланди. Ҳужжат Бишкек шаҳрининг Биринчи май туман суди 3-июндаги ҳукмини ижро этиш мақсадида қабул қилинган.
Фармонга кўра, Атамбоев “Қирғизистон Қаҳрамони” унвони, “Манас” орденининг ИИ даражаси, “Данакер” ордени ҳамда “Данк” медалидан маҳрум этилди. Шунингдек, ушбу мукофотларни беришга оид илгари чиқарилган бир қатор президент фармонлари ҳақиқий эмас деб топилди.
Давлат мукофотлари ва уларга оид ҳужжатларни белгиланган тартибда олиб қўйиш Бош прокуратура ҳузуридаги суд ижрочилари хизматига топширилди. Фармон имзоланган кундан бошлаб кучга кирган.
