Joriy yil 1 yanvarga o‘tar kechasi Farg‘ona viloyatining Qo‘qon shahrida qo‘lbola pirotexnika vositalaridan foydalanib, mushakbozlik uyushtirgan shaxslar ma’muriy javobgarlikka tortildi. Bu haqda viloyat Ichki ishlar boshqarmasi xabar berdi.
Qayd etilishicha, 31 dekabr kuni soat 23:55 da Qo‘qon shahri A. Charchiy ko‘chasida shu yerda yashovchi fuqarolar Yangi yil bayramini nishonlash maqsadida yo‘lning qatnov qismiga chiqib, mushakbozlik uyushtirishga uringan. Taxminan 10–15 nafar shaxs tomonidan O‘zbekiston tumanining Ohunqaynar qishlog‘ida qo‘lbola usulda tayyorlangan pirotexnika vositalari otilgan.
Tuman Ichki ishlar bo‘limi tomonidan olib borilgan tezkor surishtiruv ishlari davomida mazkur huquqbuzarliklarni sodir etgan shaxslar aniqlandi. Ularga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) va 185¹-moddasi (pirotexnika buyumlarining qonunga xilof muomalasi) bilan ma’muriy bayonnomalar rasmiylashtirilib, ish sudga yuborilgan.
Huquqbuzarlardan biri tushuntirishida, "raketaqa o‘xshash maket yasalgani, "korobka" usti rangli skoch bilan o‘rab chiqilgani, ichiga esa kichik hajmdagi pirotexnika joylashtirilib, otilgani"ni ma’lum qilgan.
Sud qaroriga ko‘ra, ushbu shaxslarning har biriga 15 sutka ma’muriy qamoq hamda bazaviy hisoblash miqdorining 30 baravari miqdorida jarima jazosi tayinlangan.
Eslatib o‘tamiz, avvalroq ijtimoiy tarmoqlarda Qo‘qon shahrida 1 yanvarga o‘tar kechasi omma tartibsizliklari yuz bergani va avtomobil yoqib yuborilgani haqida xabarlar tarqalgan edi. Keyinchalik Farg‘ona viloyati Ichki ishlar boshqarmasi mazkur xabarlarni rad etgan.
