Qirg‘izistonda Prezident Sadir Japarovning besh yillik faoliyatiga bag‘ishlangan to‘rt qismli "Prezident" hujjatli filmi namoyish etildi. Filmning ikkinchi qismida qirg‘iz–tojik chegarasidagi keskin vaziyat va uni bartaraf etish jarayonlari haqida so‘z boradi.
Sadir Japarovning aytishicha, ushbu murakkab masalaga yechim topilishida O‘zbekiston prezidenti Shavkat Mirziyoyevning maslahatlari va vazmin diplomatik yondashuvi muhim rol o‘ynagan. U sammit va uchrashuvlar davomida Tojikiston rahbari bilan chegara masalasini bevosita muhokama qilish tashabbusini ilgari surganini aytgan.
“Bu jarayonda Shavkat Mirziyoyevning o‘rni juda katta bo‘ldi. U kishi muammoni aynan shu paytda hal qilish kerakligini, aks holda keyin kech bo‘lishi mumkinligini ta’kidladi va yon berishga borish lozimligini maslahat berdi”, — dedi Qirg‘iziston prezidenti.
Shuningdek, Qirg‘iziston tashqi ishlar vaziri Jeenbek Qulubayev ham O‘zbekiston prezidentining tashabbus va sa’y-harakatlarini yuqori baholab, chegara mojarolarining davom etishi mintaqaviy barqarorlik va investitsion jozibadorlikka salbiy ta’sir ko‘rsatishini Mirziyoyev bir necha bor ta’kidlaganini qayd etdi.
